Хантан эрэ кэлэри баайан испиппин санааммын, төлө туппут түгэннэрим түүтэхтэрин тутабын. Баайыы баайым эрэ баар буола сылдьыбыппын, баҕар, кэлин кэпсиэҕэ. Чып кистэлэҥҥэ өр сыппыт кэмэ кэлэн тиллиэҕэ. Өҥө суоҕун өтүүктээминэ, ордугу-хоһу сыбаан, уруккуга орооһумуна, хайдах баарынан, сүрэх сүбэтинэн саас-сааһынан сапка курдук тиспиппин ылҕаабакка ыытабын. Кэми кэмҥэ дьүөрэлиир, кэми кэмниин ситимниир түүтэхтэри сүөрэр кэми бэлиэр кэтиим.

Туох эрэ суруллуон

Бу киэһэ күүтэбин,

Алҕаска бэриллиэн

Ааттаһа үҥэбин.

Үргүүк тыл үөрүттэн

Биир тылы тутуум диэн,

Куруук баар кыраттан

Арыллан кэллин диэн.

Үрүҥ лиис эрэлин

Мин онно холбуубун,

Уонна быыс сүтэрин

Тыыммакка маныыбын...